कञ्चनपुर : लालझाडी गाउँपालिका–१ विनाबारीका ४५ वर्षीय रमेश बडायक र उनकी श्रीमती ४३ वर्षीय कमल मृत फेला परेका छन् ।
जिल्ला प्रहरी कार्यालयका प्रहरी नायब उपरीक्षक उमेशप्रसाद जोशीका अनुसार आज बिहान दुबै जना मृत फेला परेका हुन् । त्यसबारे स्थानीयले प्रहरीलाई बिहान खबर गरेका थिए ।
सुदूरपश्चिम प्रदेश प्रहरी कार्यालयबाट तालिमप्राप्त कुकुर मगाएर प्रहरी टोली अहिले घटनास्थलमा छ । घटनास्थल अहिले सील गरिएको छ ।
बिनवारीमा उनीहरुले नास्ता पसल सञ्चालन गर्दै आएका थिए । पसल जोडिएको घरमा उनीहरु मात्रै बस्दै आएका थिए ।
बडायक दम्पतीका दुई छोरा र एक छोरी छन् । रमेशको शव आँगनमा भेटिएको हो । उनकी श्रीमती कमलाको शव नजिकै बरण्डामा भेटिएको हो। सुत्ने बेडको नजिकै झुलमा रक्ताम्य शव लटपटिएको थियो ।
प्रारम्भिक अनुसन्धानमा धारिलो हतियार प्रयोग गरेर उनीहरुको हत्या भएको हुनसक्ने आशंका प्रहरीले गरेको छ ।
