रौतहट : रौतहटमा मंगलबार बिहान दर्शनार्थी चढेको स्कर्पियो दुर्घटना हुँदा ८ जनाको मृत्यु भएको छ भने ५ जना घाइते भएका छन् । बाराको विश्व प्रसिद्ध पञ्चवर्षीय गढीमाई मेला हेरेर सिरहा फर्किन लागेको स्कार्पियो रौतहटको चन्द्रनिगाहपुरमा दुर्घटना हुँदा ८ जना यात्रुको मृत्यु भएको हो ।
गढीमाई मेलाबाट फर्किदै गरेको बा १६ च ३१६२ नम्बरको स्कर्पियो जिल्लाको चन्द्रपुर नगरपालिका –४ पूर्वपश्चिम राजमार्गस्थित धन्सर पुल नजिकैको जंगलमा रुखमा ठोक्किएर दुर्घटना भएको प्रहरीले जनाएको छ ।
स्कार्पियो अनियन्त्रित भई रुखमा ठोकिएको थियो । दुर्घटनामा परी सिरहाको अर्नामा नगरपालिका–३ बंठिया टोलका रामकुमारीदेवी महरा, रामकुमारी महरा, सकुन्तलादेवी महरा, उर्मिला महरा, लरुवतीदेवी महरा, महगीदेवी महरा, फुलमन्तीदेवी चमार र चालक श्रीकुमार यादवको मृत्यु भएको छ । मृतकहरूको चन्द्रनिगाहपुर अस्पतालमा सनाखत गरिएको हो ।
दुर्घटनामा घाइते भएका राधा राम, आर्यन राम, देवकुमारी महरा, रितिक महरा र कन्यादेबी महरालाई उपचारका लागी पर्साको वीरगञ्ज पठाइएको प्रहरीले जनाएको छ ।
