काठामाडौंः नेपाली कांग्रेसका नेता डा. शेखर कोइरालाले केन्द्रको हस्तक्षेपले गर्दा प्रदेश राम्ररी चल्न नसकेको धारणा राखेका छन् । 

जनकपुरधाममा आइतबार पत्रकार सम्मेलमा बोल्दै नेता कोइरालाले केन्द्रले संघीयताको मर्म नबुझेका कारण निजामती कर्मचारी ऐन, शिक्षा ऐन, प्रहरी ऐन लगायतका ऐन हालसम्म बन्न नसकेको र यसमा आफू स्वयं पनि जिम्मेवार रहेको बताए ।

मधेश प्रदेश मात्र नभएर सात वटै प्रदेशमा यसले प्रभाव परिरहेको उनले धारणा राखे । यसमा कांग्रेसलगायत केन्द्रमा भएका सम्पूर्ण पार्टी उत्तिकै जिम्मेवार रहेको उनले बताए । त्यस्तै, यसको समाधानका लागि जतिसक्दो चाँडो निजामती कर्मचारी ऐन, प्रहरी ऐन, शिक्षा ऐन ल्याउन आवश्यक रहेको उनले बताए । 

तत्काल यी ऐन नल्याए प्रदेश नचल्ने उनको भनाइ छ । सीडीओलाई प्रदेशको गृहमन्त्रीले चलाउन नसक्ने अवस्था रहेकाले नियम कानुन बनाएर दिन आवश्यक रहेको उनले औंल्याए ।