काठमाडौं : कोशी प्रदेशका प्रदेश प्रमुख पर्शुराम खापुङले वैशाख ६ गतेका लागि प्रदेश सभाको विशेष अधिवेशन आह्वान गरेका छन् ।

नेकपा एमाले र नेकपा माओवादी केन्द्रका सांसदहरूले विशेष अधिवेशन आह्वान गर्न माग गर्दै गत सोमबार निवेदन दिएका थिए ।

गत चैत २६ गते एमाले र माओवादी केन्द्रका ५२ सांसदले केदार कार्की नेतृत्वको सरकारलाई दिएको समर्थन फिर्ता लिँदै मुख्यमन्त्री र सरकारलाई निर्देशन दिनुपर्ने भएकाले अधिवेशन मागसहित निवेदन दिएका हुन् ।

त्यसपछि मुख्यमन्त्री कार्कीले पनि मन्त्रीपरिषद्को निर्णयअनुसार २०८१ जेठ ११ गते संसदको नियमित अधिवेशन आह्वानका लागि निवेदन दिएका थिए ।

तर बुधबार सूचना जारी गर्दै प्रदेश प्रमुख खापुङले संविधानको धारा १८३ को उपधारा ३ अनुसार वैशाख ६ गते दिउँसो १ बजेका लागि विशेष अधिवेशन आह्वान गरेका हुन् ।